علاج دمعه العين عند الحمام (التهابات العين) بأبسط دواء وشرح لمشكله دمعه العين

كل مربيين الحمام تقريبا بيعانو من مشكله دمعه العين عند الحمام ان شاء الله النهارده هعرفك ازاى تواجه المرض ده وتحله بكل سهوله .

اولا تعريف مرض دمعه العين

زى ماهو موضح بالصوره كدا دمعه العين هى التهابات بتظهر ف عين فرد الحمام وتعمله احمرار وبتكون تجبنات لونها صفراء داخل العين المرض ده بييجى نتيجه التراب الى بيكون فى غرفه الحماموالريش الصغير النواعم وكمان بييجى من البرد والبرد بيقلب لدمعه عين طيب ايه هو علاج المرض .

علاج مرض دمعه العين 

علبه دواء مضاد حيوى بودر بيطرى اسمه اوكسي فيت ده بصراحه ياجماعه سحر من اول مره والله هيقضي على دمعه العين دى تماما وعن تجارب كتير جدا وبيعطى نتيجه 100% . 

الوقايه من المرض

علشان تعمل وقايه من مرض دمعه العين عند الحمام يجب تنظيف غرفه التربيه بأستمرار ويجب فى فصل الشتاء انك تقفل تيارات هواء الوجه البحرى علشان تيارات الهواء دى بتسبب البرد المصاحب لدمعه العين .

طريقه الاستخدام وركز جدا معايا 

هتعزل طبعا فرد الحمام المصاب لان المرض ده معدى جدا بعد كدا هتجيب قطنه او منديل غير معطر وتبله مايه دافيه وتنظف التجبنات الى داخل العين المصابه جيدا وبعد كدا هتجيب معلقه شاى صغيره وتاخد شويه صغيرين بطرف المعلقه كدا بودر اوكسي فيت وتفتح العين المصابه وتحط فيها العلاج ده بودر زى ماهو كدا وبعد كدا هتدوب شويه كمان بطرف المعلقه على 5 سنتى مايه وتشربهم لفرد الحمام والكلام ده تعمله لمده 3 ايام وان شاء الله هتلاقى تحسن ملحوظ جدا من اول يوم علاج .

البديل البشرى

بديل علاج اوكسي فيت البشرى هو تتراسييد كبسولات 250 بشرى  او تتراسيكيلين ونفس طريقه الاستعمال بتاعه الاوكسي فيت يعنى هتفك كبسوله تاخد منها شويه بودر تحطها فى العين المصابه وباقى الكبسوله تخفها ب5 سنتى مايه وتشربها لفرد الحمام وبأذن الله نفس النتيجه ولاكن العلاج ده بيظهر مفعوله بعد 3 او 4 ايام والعلاج البشرى لمده 5 ايام وبكدا تكون نهيت تماما مشكله دمعه العين .

وختاما ده فيديو شرح عملى لحاله دمعه عين وتم علاجها باوكسي فيت مع شرح العلاج عملى .